.gif)
कैलाली । कैलालीमा एक महिलालाई हत्या गरेको आरोपमा उनकी सासुलाई पक्राउ गरिएको छ भने ससुरा फरार रहेका छन् । मङ्गलवार जिल्लाको गौरिगङ्गा नगरपालिका—१ स्थित केदारेश्वर सामुदायिक वनमा २८ वर्षीया कविता बुढा मृत फेला परेकी थिइन् ।
प्रहरीका अनुसार उनको शव हिजो वनमा खाल्डोभित्र गाडिएको अवस्थामा फेला परेको थियो । बुढाका परिवारले उनी हराएको भन्दै सोमबार मात्र खोजीका लागि प्रहरीमा निवेदन दिएका थिए। उनको हत्या गरेर शव गाडिएको प्रहरीको भनाइ छ ।
मृतक बुढाका श्रीमान रोजगारीको सिलसिलामा भारतमा रहेको स्रोतले जनाएको छ । उनका दुई जना छोराछोरी रहेका र केही दिनअघि मात्रै उनको ससुरासँग झगडा भएको बताइएको छ । फरार ससुराले नै उनको हत्या गरेको प्रहरीको आशंका छ । उनी घरमा सासू ससुरा र देउरानीसँग बस्दै आएकी थिइन् ।
.gif)
पक्राउ परेकी सासुमाथि अनुसन्धान गरिरहेको प्रहरीले जनाएको छ। फरार ससुराको खोजी कार्य जारी रहेको प्रहरीले बताएको छ ।
