.gif)
महेन्द्रनगर । कञ्चनपुरको शुक्लाफाँटा नगरपालिका–४ स्थित प्राचीन सिद्धनाथ बैजनाथ मन्दिरमा हिजो (शुक्रवार) कृष्ण प्रतिपदाको अवसर पारेर प्राण प्रतिष्ठाको कार्यक्रम गरी भगवान् शिवको मूर्ति स्थापना गरिएको छ ।
पञ्च ब्राम्हणले मन्त्रोच्चारण गरी भगवान शिवको मूर्तिको प्राण प्रतिष्ठा गरेका हुन् । स्थानीय भक्तजनले चन्दा सङ्कन गरी मन्दिर निर्माणसँगै भारतबाट अराध्यदेव शिवको सिंहमरमरको मूर्ति ल्याएका हुन् । मूर्तिसँगै मन्दिरमा शिव लिङ्ग पनि स्थापना गरिएको छ ।
मन्दिरको प्राण प्रतिष्ठा कार्यक्रममा नगर उपप्रमुख कल्पना पन्त, नगर प्रवक्ता लालबहादुर ऐर, वडाध्यक्ष कमल ठकुल्ला, दानसिंह ऐर, रमेश ऐर, नरेन्द्रप्रसाद चौधरीलगायत उपस्थित थिए । सिद्धनाथ बैजनाथ मन्दिर यसक्षेत्र कै प्राचीन मन्दिर हो ।
स्थानीय सामाजसेवी करन सिंह ऐरका अनुसार १० लाख रुपैयाँ चन्दा संकलन गरी मन्दिर निर्माण गरिएको हो । मन्दिरको भौतिक पूर्वाधार विकासमा वडा कार्यालयबाट ३ लाख रुपैयाँ बरावरको सहयोग प्राप्त भएको छ ।
