.gif)
काठमाडौं । कोड फर चेन्जद्वारा आयोजित कोडफेस्ट २०२४ को पहिलो चरण 'कोडफेस्ट आइडियाथन २०२४' देशका सात प्रमुख शहरहरूमा सञ्चालन हुने भएको छ। यस कार्यक्रममा १०० भन्दा बढी टिमहरूले सहभागिता जनाउने छन्।
आइडियाथनमा सहभागी टिमहरूले विभिन्न अन्तरक्रियात्मक सत्र र मेन्टरसिप कार्यक्रमहरूमा भाग लिनेछन्। साथै, उनीहरूले आफ्ना विचारहरू विज्ञ निर्णायकहरू समक्ष प्रस्तुत गर्ने अवसर पाउनेछन्। आयोजकका अनुसार यो कार्यक्रम प्रतिस्पर्धात्मक प्रतियोगिता नभई सृजनशीलता, व्यवहारिक सिकाइ र सामुदायिक समाधानको उत्सवको रूपमा मनाइनेछ।
कार्यक्रम मंसिर ४ गतेदेखि मंसिर १६ गतेसम्म विभिन्न स्थानहरूमा आयोजना हुनेछ:
- मधेश प्रदेशमा मंसिर ४ गते वीरगञ्जस्थित नेशनल इन्फोटेक कलेजमा
- लुम्बिनी प्रदेशमा मंसिर ५ र ६ गते बुटवल कालिका क्याम्पसमा
- कोशी प्रदेशमा मंसिर ६ गते इटहरीको लूनर आईटी सोलुसन हलमा
- सुदूरपश्चिम प्रदेशमा मंसिर ६ गते धनगढीको नास्ट कलेजमा
- चितवनमा मंसिर ८ गते अरोमा कलेजमा
- काठमाडौंमा मंसिर ७, ८ र ९ गते मैतिदेवीस्थित एलबीइएफ कलेजमा
- पोखरामा मंसिर १६ गते पोखरा इभेन्ट सेन्टरमा
यस चरणबाट छनोट भएका टिमहरूले डिसेम्बरमा काठमाडौंमा आयोजना हुने राष्ट्रिय स्तरको ह्याकथनमा सहभागी हुने अवसर पाउनेछन्। कार्यक्रममा विभिन्न संस्थाहरूले साझेदारी गरेका छन्, जसमा प्रेसिडेन्सियल ग्र्याजुएट स्कूल (ब्रोनज स्पोन्सर), म्हाङ्सा क्रिएसन्स, एलबीइएफ कलेज, टेकस्पायर कलेज, ब्रोडवे इन्फोसिस लगायत रहेका छन्।
यो कार्यक्रम विद्यार्थीहरूका लागि आफ्ना विचारहरू प्रस्तुत गर्ने, मान्यता प्राप्त गर्ने र वास्तविक समस्याहरूको समाधानमा योगदान दिने एक अद्वितीय अवसर रहेको आयोजकले बताएका छन्।
