महेन्द्रनगर । कन्चनपुरका नदि, खोलाबाट अबैधरुपमा नदिजन्य पदार्थ उत्खननको कार्य रोकिएको छैन । जिल्ला स्थित विभिन्न स्थानामा खोला एवम् नदिबाट अवैधरुपमा गिट्टी, बालुवा उत्खनन नरोकिएको गुनासो गरिएको हो । 

शुक्लाफाटा नगरपालिका-८ स्थित अनौखी खोलाबाट अबैधरुपमा गिट्टी उठाउने कार्य नरोकिएको गुनाको सो क्षेत्रका स्थानीयको रहेको छ । 

वडा नम्बर आठकी मानमती धामीले रातिको समयमा ट्याक्टर ल्याएर अनौखी खोलाबाट अबैध रुपमा गिट्टी लग्ने गरेको बताइन् । आफुहरुलाई चाहिएको बेला गिट्टी उपलब्ध नहुने तर तस्करहरुले धमाधम गिट्टी लग्ने गरेको उनले बताइन् । 

नगरपालिकाले अनौखी खोलामा ठेक्का प्रक्रिया अगाडी नबढेकाले तस्करहरुले उक्त खोलाबाट नदिजन्य पदार्थ उत्खनन गर्ने गरेको भेटिएको जनाएको छ । 

नगरपालिकाका प्रवक्ता लाल बहादुर एरले गौणी खोलामा भने ठेक्का सम्झौता भएको तर अनौखी खोलामा भने ठेक्का सम्झौता हुन बाकी रहेको बताए ।  

दिनमा स्थानीयहरुले तस्करहरुलाई भगाउने काम गरेपनि रातीको समयमा भने तस्करहरुले नदिजन्य पदार्थ लग्ने गरेको भेटिएको उनले बताए । 

मंगलवार जिल्ला समन्वय समिति कंचनपुरका प्रमुख दुर्गा दत्त बोहरा , प्रमुख जिल्ला अधिकारी , इलाका प्रहरी कार्यालय झलारी र पत्रकारसहितको टोलिले अनौखी खोलाको अनुगमन गरेको हो । 

अनुगमनका क्रममा अबैधरुपमा उत्खनन गरिएको गिट्टी सहित ट्याक्टर नियन्त्रणमा लिईएको इलाका प्रहरी कार्यालय झलारीले जनाएको छ । नियन्त्रणमा लिइएको ट्याक्टर आवस्यक कार्वाहीका लागि शुक्लाफाटा नगरपालिकाकाई बुझाईएको प्रहरीले जनाएको छ ।

नरपालिकाले भने पहिलो पटकका लागि उक्त ट्याक्टर चालकलाई रु १५ हजार जरिवाना गरि छोडिएको जनाएको छ । 

गिट्टी भने जफत गरिएको नरपालिकाका प्रवक्ता एरले जनाए । जिल्ला समन्वय समिति कंचनपुरका प्रमुख दुर्गा दत्त बोहराले अबैध रुपमा भईरहेको नदिजन्य पदार्थ उत्खनन रोक्न सरोकारवाला निकायलाई सुझाव दिएको बताए । उनले जिल्ला स्थित सबै पालिकामा अनुगमनको कार्य चलिरहेको बताए । 

मंगलवार जिसस प्रमुख बोहराले शुक्लाफाटा नगरपालिका वडा नम्बर आठ स्थित अनौखी खोलामा अबैध रुपमा नदिजन्य पदार्थ उत्खननको कार्यरोक्न निर्देशन दिएका थिए ।