.gif)
महेन्द्रनगर । अढाई दशकदेखी चर्चामा रहेको कञ्चनपुरको दैजी–छेला औद्योगिक क्षेत्रको शिलान्यास भएको यही फागुन १० गते २ वर्ष पुग्दै छ ।
२ वर्षभित्र पूर्वाधार निर्माण गरिसक्ने लक्ष्य लिइएको दैजी–छेलामा भौतिक पूर्वाधारतर्फ अहिलेसम्म कुनै पनि काम शुरू हुन सकेको छैन । प्रस्तावीत औदोगिक क्षेत्रको जग्गाको भोगाधिकार बिनै सोमबार उद्योग वाणिज्य तथा आपूर्ती मन्त्री दामोदर भण्डारीले सम्र्पक कार्यालयको उद्घाटन गर्नुभएको छ । कञ्चनपुरको बेदकोट नगरपालिका –२ स्थित औद्योगिक क्षेत्रको शिलान्यासको दुई वर्षपछि अहिले रुख छपानको काम भइरहेको छ ।
औद्योगिक विकास लिमिटेडले शिलान्यास भएको १ महीनाभित्र उद्योग स्थापनाका लागि आशयपत्र आह्वान गर्ने, त्यसको आधारमा ६ महीनाभित्र उद्योगीहरूलाई चाहिने न्यूनतम पूर्वाधार (अस्थायी सडक, विद्युत्, पानीलगायत)को व्यवस्थापन गरी औद्योगिक क्षेत्रको काम अघि बढ्ने बताएको थियो । तर दुई वर्षभित्र उद्यमीका लागि आवश्यक पूर्वाधार तयार गरी सञ्चालनमा ल्याउने र ५ वर्षभित्र सम्पूर्ण पूर्वाधार निर्माण गरिसक्ने लक्ष्य राखेको कम्पनीले आशयपत्र आह्वान र रूख छपानको कामबाहेक अन्य भौतिक प्रगति गर्न सकेको छैन ।
कञ्चनपुरको वेदकोट नगरपालिकामा २०५१ सालदेखि छेलामा औद्योगिक क्षेत्र स्थापनाको चर्चा हुँदै आएकोमा २०७७ फागुन १० मा तत्कालीन प्रधानमन्त्री केपी शर्मा ओलीले औद्यौगिक क्षेत्रको शिलान्यास गरेका थिए । औद्योगिक क्षेत्र स्थापनाको शिलान्यासपछि समयमै निर्माण सम्पन्न भएर सञ्चालनमा आउने आशा गरेका स्थानीयवासी ढिलाइ हुँदा निराश छन ।
