महेन्द्रनगर । कञ्चनपुरमा कोभिड विरुद्धको तेस्रो मात्रा र चौथो मात्राको खोप अभियान सुरु भएको छ ।
जिल्ला स्वास्थ्य कार्यालय कञ्चनपुरका अनुसार पश्चिमी सिमानाका गड्डाचौकीबाट नेपाल भित्रिनेहरुमा कोरोना संक्रमण देखिन थालेपछि बुस्टर डोज दिईन थालेको हो । जिल्ला स्वास्थ्य कार्यालय कञ्चनपुरका प्रमुख दयाकृष्ण पन्तले कोरोना संक्रमण देखा पर्न थालेपछि खोप दिने क्रम सुरु भएको बताए । “अहिले ज्येष्ठ नागरिक, स्वास्थ्यकर्मी, गर्भवती र रोग प्रतिरोधात्मक क्षमता कम भएकाहरूलाई बुस्टर डोजका रूपमा खोप दिन थालिएको छ ।” प्रमुख पन्तले भने–“जिल्लाका सबै वडाहरुमा खोप अभियान सुरु भएको छ ।”
बुस्टर डोजका लागि कञ्चनपुरमा ५० हजार डोज आएको र आवश्यकता अनुसार थप हुने उहाँले बताउनुभयो । नयाँ वर्ष नजिकिँदै गर्दा भारतबाट घर फर्किनेको संख्या बढ्न थालेको छ ।
नयाँ वर्ष मनाउन फर्किनेको संख्या बढेपछि नाकामा एन्टीजेन परीक्षणमा कडाइ गरिएको छ । “अहिले सीमानाकामा भारतबाट आउनेको एन्टिजेन परिक्षण गरिरहेका छौँ ।” उनले भने–“पछिल्लो समय कोभिड विरुद्धको खोप लगाउन आउनेको संख्यामा कमि आएको छ ।” जिल्ला स्वास्थ्य कार्यालयका अनुसार हालसम्म कञ्चनपुरमा ४८ दशमलव ३० प्रतिशतले खोप लगाएका छन । चार लाख चार हजार पाँच सय ४५ जनाले कोरोनाविरुद्धको खोपको पहिलो मात्रा तथा तीन लाख ६४ हजार सात सय ८५ जनाले दोस्रो मात्रा लगाएका छन ।
त्यसैगरी दुई लाख १६ हजार छ सय ६७ जनाले खोपको तेस्रो मात्रा लगाएका छन ।
