.gif)
काठमाडौँ । इजरायल र हमास समूहबीच आजदेखि लागू हुने युद्धविराममा नेपालले विपिन जोशीको रिहाइका लागि पहल थालिएको छ । चार दिने युद्धविरामको क्रममा विपिनको रिहाइका लागि सरकारले पहल थालेको हो ।
इजरायलले हमास समूहविरुद्धको युद्ध चार दिनका लागि रोकेको छ । आजदेखि लागू हुने युद्धविराममा हमासले बन्धक बनाएका ५० जनालाई रिहा गर्ने सहमति भएको छ ।
परराष्ट्रमन्त्री एनपी साउदले नेपालमा रहेको इजरायली राजदूत हनान गोदेरलाई भेटेर युद्धविरामको यस अवधिमै विपिनको रिहाइका लागि पहल गरिदिन अनुरोध गरेका छन् । हिजो (बिहीवार) मन्त्रालयमा भएको भेटमा उनले चार दिने युद्धविरामको क्रममा जोशीको उद्धारका लागि पहल गरिदिन अनुरोध गरेका हुन् ।
सोही क्रममा राजदूत गोदेरले यो विषयलाई इजरायल सरकारले प्राथमिकतामा राखेको बताए।
गत असोज २० गते हमासले इजरायलमा आक्रमण गर्ने क्रममा विपिनलाई बन्धक बनाएर गाजातर्फ लगेको थियो । इजरायली सेनाले भने गाजामा रहेको एक अस्पतालमा विपिन सुरक्षित रहेको जनाएको छ ।
