एजेन्सी । लखनऊ सुपर जायन्ट्सलाई हराउँदै सर्वाधिक ५ पटकको विजेता मुम्बई इन्डियन्स भारतमा जारी १६ औं संस्करणको इन्डियन प्रिमियर लिग (आइपिएल)को दोस्रो क्वालिफायरमा प्रवेश गरेको छ ।
बुधवार चेन्नाईमा रहेको एमए चिदम्बरम क्रिकेट रंगशालामा भएको इलिमिनेटर खेलमा लखनऊलाई ८१ रनले हराउँदै दोस्रो क्वालिफायरमा प्रवेश गरेको हो ।
मुम्बईले दिएको १८३ रनको लक्ष्य पछ्याएको लखनऊले १६।३ ओभरमा अलआउट हुँदै १०१ रन मात्र बनायो । लखनऊका लागि मार्कस स्टोयनिसले सर्वाधिक ४० रन बनाए । मुम्बईका लागि आकाश मधवालले ३ दशमलब ३ ओभरमा ५ रन खर्चिएर ५ विकेट लिए । क्रिस जोर्डन र पियुष चावलाले समान १—१ विकेट लिए ।
त्यसअघि टस जितेर पहिला ब्याटिङ गरेको मुम्बईले निर्धारित २० ओभरमा ८ विकेट गुमाउँदै १८२ रन बनाएको थियो । मुम्बईका लागि क्यामरन ग्रिनले २३ बलमा ६ चौका र १ छक्कासहित सर्वाधिक ४१ रन बनाएका थिए । यस्तै, सूर्यकुमार यादवले ३३, तिलक बर्माले २६ तथा नेहल वाडेराले २३ रन बनाए । लखनऊका नवीन उल हकले ४ ओभरमा ३८ रन खर्चेर सर्वाधिक ४ विकेट लिए पनि टोलीलाई जिताउन सकेनन् ।
इलिमिनेटर खेलमा लखनऊलाई पराजित गरेसँगै मुम्बईले दोस्रो क्वालिफायरमा स्थान बनाएको छ । पराजित लखनऊ भने प्र्रतियोगिताबाट बाहिरिएको छ ।
मुम्बईले दोस्रो क्वालिफायरमा गुजरात टाइटन्ससँग शुक्रबार खेल्ने छ ।
