यक गउँमा यकजना जाेगी, सन्यासीन खुबै निकाे माण्न्या मान्सु बसन्थ्याँ । जाेगी धेकन्जाँइ आहा ! यिनरी सेवा चाकरी गद्द पायाबरे बाँच्या: लाेग्य हुनेथ्याे भुणि साेच्च्यारैछ:। एकदिनै काँइ इथउथ झान्याबेला बटामाञि जाेगी भिटिगैछ । जाेगीसित उइका  बाबाजी रामराम, नारायण नारायण  चलिगैछ । उइले कुरड़िकानी गद्दागद्दाइ मेरा घर चलाई हाेलि महाराज ! भुण्या प्रस्ताव बाबाजि थाँइ राखिहालिछ । छकाला बारएक बज्याइ  बकत ,परभात् बठेइ केइ नखानाले भाेकले उलि:रयाे हनाले  जाेगीले हुन्छ भुण्न्या संकेत दिन्यागरि मुण्डाे हल्काइहालिछ। बाबाजिलाई त ढुङाे खाेज्जा: देपता मिलिग्याे । जाेगीले पैल्लाेइ प्रस्ताव स्वीकार गरेकाे धेकीबरे उइकाे त काेठाे चहकिगयाे । लाै आज त बाबाजीलाई टन्न खीर खाेयाैनाै आशिर्वाद लै लिनाै रे केइ भउत मनमा लाग्या कुरालै साेद्द पायिन्या भयाे भुणि मनमनै साेच्च पसिगयाे रे बाबाजिलाई अइतिर लगाईबरे घरतिर फर्किगयाे । घरआइबरे उइले अफनि बुढ़ि बाेलाइछ , खीरसिर पकाैन लगाइहालिछ । बुढ़िले लै फटाफट गाईका दूदमा फटाफट न्यारी खीर पकाइहालिछ । बुढ़ो जाेगीका मुखैनी जिउनार गराैनाइ खीर लैनिगयाे । " बाबाजि भाेजन ग्रहण किजियें" , उ बाबाजिलाई खाेयुनाकि तुक्तारि गयाे ।  " चलाे वेटा ठिक है " भुणिबरे बाबाजि खाना खान पसिग्या । खीरसिर खाइसक्या पछा : " बाबाजि भाेजन कैसा रहा" भुणिबरे साेद्याे त बाबाजिले " बेटा दिन घिच् गया " भुणिच् । 

दुईचारदिन बस्साकि बिन्ती बिसायापछा बाबाजि उसैका घर  अखडा जमाैनाकि तयार हाेइग्यान् । अर्खादिन आँजि तैले लाैनसेल पकाईबरे बाबाजिकि खाेयाैनि चुठाैनि गरिछ । उसैदिनकि जानि खायापछा " बाबाजि भाेजन कैसा लगा" (खनाइ कसाे भ्याे ब बाबाजि) भुणिबरे साेद्द्याबेला बाबाजिले आँजि उसाेइ " बेटा दिन घिच् गया" भुण्न्या उत्तर दि छ पुइ । एइ जाेगीलाई खीर खाेयेया त दिन घिचगया ( दिन काटिग्याे) भुण्याे, लाैनसेल खाेयेया लै उसाेइ भन्च । जाेगीले यिसाे क्याइ भुण्याे ? भुणिबरे उइका मनमा शंका पडिगयाे । आब तेसरा दिन तैले जाेगीलाई घाेगा: राेटा खाेयुन्या रे उतिपछा साेद्द्या बिचार गरिहाल्याे । अफनी घरिनाथाँइ आज त घाेगाः राेटा पका बुढ़ि तै जाेगी घाेगाः राेटा खाेयुनाैं रे पुइ जाणलाे ताे लै भुणिबरे आदेश दिहाल्याे । बुढ़ि अचम्म पडिगै , बेलिसम्म बुढ़ो बाबाजि भुण्नामा थ्याे, आज निच्छलाे जाेगी भुण्नामा छ ।तसाे सुच्चिसुच्चि घरिना राेटाे पकाैन निसिगै । घरिनाले राेटा पाक्या संकेत गर्यापछा उ जाेगीकि खानाकि लिउन नि गयाे । पैल्लिका दिनकि जनि जाेगीलाई खाेयेयाचुठेया पछा आजि उसाेइ सवाल तेर्स्याइहाल्याे " बाबाजि भाेजन कैसा लगा?" जाेगीले सदाबहार उसाेइ " बेटा दिन घिच् गया" भुण्न्या उत्तर दिहाल्याे । आब तैलाई चटिपटि हाेइगै । एइ जाेगीलाई जि खाेयेया लै दिन घिच् गया मात्तरि भन्च रे एइकाे राज के रैछ ? साेद्दु पडिगयाे । तै ले साेदिहाल्याे " बाबाजि आपकाे मै ने खीर खिलाया, दिन घिच् गया बाेले । लाैनसेल खिलाया फिर वही बात कहीं और आज  मक्केकि राेटी खिलायी ताे भि वही जवाफ हैं, बात क्या है " । 

" बेटा तुम जाे कुछ भि खाओ पेट के अन्दर जा के सब अनाज एक ही काम करेंगे। पेट भरेगा और जीवन आगे चलेगा बस जाे उसे करना हैं । तुमनें जाे कुछ भि मुझे खिलाया उससे मेरा पेट भर् गया और दिन घिच् गया । सभी काे खा के दिन घिचनाई ताे है बेटे ! और करना ही क्या हैं ।"  बाबाजिले मुसमुस हाँसिबरे जवाफ फर्कायाे । उइले अफनि जिन्दगीमाइ ठुलाे ज्ञान हासिल आज भया  झाे थाेपड़ो बनाइबरे  सुच्चाेसुच्चाेइ चुपचाप जाेगीका मुख हेरेकाे हेरेइ रयाे ।

मीतबन्धु