.gif)
महेन्द्रनगर । कञ्चनपुरमा चैत्र २५ गते देखी टाइफाइड विरुद्धको खोप अभियान सञ्चालन गरिने भएको छ । १५ महिना देखी १५ वर्ष मुनीका बालबालिकाहरूलाई टाइफाइड विरुद्धको खोप लगाइने स्वास्थ्य कार्यालयले जनाएको हो ।
स्वास्थ्य कार्यालयका अनुसार चैत्र २५ गते देखी वैशाख १८ गते सम्म बालबालिकाहरूलाई नियमित रूपमा खोप लगाइने छ । कञ्चनपुरका १ लाख ६१ हजार १ सय बालबालिकाहरूलाई टाइफाइड विरुद्धको खोप लगाइने स्वास्थ्य कार्यालयका प्रमुख शिवराज सुनारले जानकारी दिए ।
खोपका लागी जिल्लाका ५ सय ५४ विद्यालय छनौट गरिने उनले जनाए । कम्तीमा २ सय भन्दा बढी विद्यार्थी भएका विद्यालयमा खोप अभियान सञ्चालन गरिने स्वास्थ्य कार्यालयले जनाएको छ । विद्यालयको पहुँच भन्दा बाहिर रहेका बालबालिकाको हकमा भने सम्बन्धित पालिकामा रहेका स्वास्थ्य केन्द्रमार्फत खोप दिइने छ ।
करिब २९ हजार ३ सय बालबालिका विद्यालय बाहिर रहेको स्वास्थ्य कार्यालयको आङ्कलन छ । स्वास्थ्य कार्यालयका प्रमुख शिवराज सुनारका अनुसार एड्स सङ्क्रमित, दिर्घरोगीहरुलाई भने खोप दिइने छैन ।
अन्य उमेर समूहलाई पनि खोपमा सामेल गराइने स्वास्थ्य कार्यालयले जनाएको छ ।
