नारी आमा सफल गृहिणी जिन्दगी पुण्य खास
नारी योद्धा युग पुरुषको बस्दछिन् आसपास ।
नारी आत्मा सुख शयलमा सृष्टि यो चल्नुपर्छ
नारी घाती सब किसिमका जिन्दगी ढल्नुपर्छ ।।१
नारी साथी विकट पथमा बन्न सक्छिन् सहारा
बत्ती जस्तै झलमल बनी चम्किने हुन् सितारा ।
नारी हाँस्दा हर महलमा बल्दछन् दीप तुल्य
देवी माता सुयश मनमा भर्न थाल्छिन् अमूल्य ।।२
आमा बन्दा मधुर ममता साथ सन्तान राखी
छोरी चोखी सकल घरकी लच्छिनी बन्दछिन् ती ।
प्यारी बन्दा दिनहुँ गुलियो पार्दछिन् भोजनादि
नारी याैटै महल नभए गेह बन्छन् समाधि ।।३
नारी गाथा कतिपय अझै शोषिएका सुनिन्छन्
नारी भाका हक सुख अझै खोसिएका सुनिन्छन् ।
नारी एक्ली अबुझ अबला छैन ऐले रहेकी
पाइन्छन् ती सबल अगुवा शक्ति हाँक्ने भएकी ।।४
खप्दै पीडा सब मनुजको पाउ थाम्छिन् धरामा
हाँस्ने नाच्ने शिशु विजयमा चम्किने धन्य आमा ।
नारी पुज्दा अवनि तलमा देव हुन्छन् प्रसन्न
देवी हेप्ने असफल सडी बन्दछन् छिन्नभिन्न ।।५
छन्द : मन्दाक्रान्ता
प्रेम प्रकाश कलाैनी
शिवनाथ- २ पाैखर,बैतडी
