.gif)
बैतडी । बैतडीमा वैशाख शुक्ल नवमीमा सुरु भई बुद्ध पूर्णिमाका दिनसम्म चल्ने धुनी जात्रा सम्पन्न भएको छ । जिल्लाको मेलौली नगरपालिका ५ महारुद्रमा आज (शुक्रबार) जात्रा सम्पन्न भएको हो ।
जात्रामा धामीहरूले आगोमा तताएर रातो बनाएको फलामको पन्युलाई चाट्ने गरेका र यो नै जात्राको मुख्य आकर्षण रहेको स्थानीयको भनाई छ । देवीको शक्तिको रुपमा धामीहरूले तताएर रातो बनाएको पन्यु चाट्ने गरेका र उनीहरूलाई केही पनि नहुने एक स्थानीयका बताए ।
सुदूरपश्चिममा नै अलग पहिचान बोकेको यो जात्रामा शितलादेवीको रुपमा भगवतीको पूजाआजा गरिने र दर्शन गर्न नेपालका मात्रै नभएर सीमावर्ती भारतीय क्षेत्रका दर्शनार्थी समेत आउने गरेका छन । धुनीजात्रामा हरेक दिन भगवतीको विशेष पूजाआजा हुने गर्दछ । दमाहा बजाउने र धामी काप्ने तरीका नै यो जात्राका आकर्षण मानिन्छन् । धुनीजात्राको दर्शन तथा अवलोकनका लागि सैयौंको भीड लाग्छ । आगोको धुनी वरीपरी धामीहरू काँपेका दृश्य देखिन्छन् भने आगोमा तताएको पन्यु चाट्ने धामी हेर्नेहरूको समेत भीड लाग्ने गरेको छ ।
शीतलादेवीको पूजाआजा गरेमा रोगव्याधी नष्ट हुने जनविश्वास रहिरहँदा मेलौली नगरपालिकाको अन्य ठाउँमा भगवतीको पूजाआराधना गर्दै धुनी जात्रा गरिन्छ ।
