.gif)
प्रेमले जुट्छ हो पूर्व या पश्चिम
प्रेम बिग्रेर पो रुष्ट भो दक्षिण ।
प्रेम लुक्दा सबै नष्ट भो जीवनी
निर्धनी प्रेमले बन्छ धेरै धनी ।।१
गोप्यको भावना प्रेमले खुल्दछ
वेदना जोसुकै प्रेमले भुल्दछ ।
प्रेमले माहुरी पुष्पमा बस्दछ
प्रेम भन्ने कुरा क्रोध नै नास्दछ ।।२
प्रेमको प्रेममा प्रेमकै छाप छ
प्रेमको रापमा स्वादिलो धाप छ ।
प्रेमको दौडमा प्रीतको गीत छ
प्रेमको खेलमा प्रेमकै जीत छ ।।३
प्रेमले जानकी, रामका साथमा
पार्वती प्रेमले शम्भुका काखमा ।
प्रेम यो प्रेमिकाको विना साँच्नको
अर्थ होला र के जिन्दगी बाँच्नको ।।४
प्रेम लक्ष्मी सधैं गर्दथिन् विष्णुमा
प्रेम गर्थिन् सदा राधिका कृष्णमा ।
प्रेमिका प्रेमकी जीवनी शक्ति हून्
प्रेम नै प्रेमिका साधना भक्ति हून् ।।५
मख्खपर्छन् सबै प्रेम पाएपछि
प्रेम सङ्गीतमा काव्य गाएपछि ।
प्रेम जानिन्छ यो प्रीत लाएपछि
प्रेमको ताल आनन्द आएपछि ।।६
प्रेमको खेलमा प्रेमकै राप छ
भित्र आगो बलेको जसो ताप छ ।
प्रेम भन्दा कुनै छैन ठूलो अरू
भन्दछन् यो कुरा प्रेम गर्नेहरू ।।७
चल्छ संसार यो प्रेमकै कारण
प्रेमले विश्वमा गर्छ है धारण ।
प्रेमले जन्मिए सृष्टिका जीव यी
क्रोध बेकार हो, प्रेम हो जिन्दगी ।।८
