.gif)
बैतडी । बैतडीको दोगडाकेदार गाउँपालिका वडा नं २ कटौजपानीमा जिप दुर्घटना हुँदा १ जनाको मृत्यु भएको छ ।
सिल्लेगडा बजारबाट यात्रु बोकेर कालागोरा गाउँ जाँदै गरेको सु प्र ०१००ज १५३७ नम्बरको बोलेरो जिप मंगलबार दिउँसो कटौजपानीमा दुर्घटनामा परेको जिल्ला प्रहरी कार्यालय बैतडीका प्रवक्ता नन्दराज जोशीले जानकारी दिए ।
जिप दुर्घटना हुँदा १ जनाको मृत्यु भएका छ भने चालक सहित ७ जना घाइते भएका प्रहरीले जनाएको छ । जिपमा सवार दोगडाकेदार गाउँपालिका वडा नं ८ कालागाउँकी १५ वर्षिया मनिषा विष्टको घटनास्थलमै मृत्यु भएको प्रहरी प्रवक्ता जोशीले बताए ।
घाइते हुनेमा कालागाउँका ५० वर्षिय बिरे लुहार, २६ वर्षिया घुमरा विष्ट, ४० वर्षिया कृष्णा विष्ट,७० वर्षिया हरिमाया विष्ट, १७ वर्षिय महेश विष्ट र ३० वर्षिय जिप चालक भुपेन्द्र विष्ट रहेका छन् । घाइते मध्ये चालकको अवस्था गम्भीर रहेको र बाँकीको अवस्था मध्यम रहेको प्रहरीले जनाएको छ । घाइतेहरुको जिल्ला अस्पताल बैतडीम उपचार भैरहेको छ ।
प्रहरीका अनुसार जिपमा ८ जना सवार थिए । जिप सडकबाट ५० मिटर तल खसेको बताइएको छ ।
